វិធីសាស្រ្ត​ជៀសវាង​​​ចាញ់បញ្ឆោត​គេហទំព័រ​បោកប្រាស់!

វិធីសាស្រ្តជៀសវាងចាញ់បញ្ឆោតគេហទំព័របោកប្រាស់!

គេសង្កេតឃើញថាការចាយវាយនៅលើប្រព័ន្ធ អ៊ីនធឺណិតកំពុងមានការពេញនិយមយ៉ាងខ្លាំងសម្រាប់ប្រជាពលរដ្ឋនា ពេលបច្ចុប្បន្ន។ ស្របពេលជាមួយគ្នានេះដែរ ក៏មានជនឱកាសនិយមមួយចំនួនបានឆ្លៀតឱកាសបង្កើតគេហទំព័រមួយចំនួន ដើម្បីបោកប្រាស់យកប្រាក់ពីធនាគាររបស់គេដែរ។ ដើម្បីចៀសវាងបញ្ហាបែបនេះកើតឡើង សូមអនុវត្តតាមគន្លឹះមួយចំនួនខាងក្រោម។

ជំហានដំបូងបំផុតគឺត្រូវ ចេះមើលថាតើគេហទំព័រនោះជាគេហទំព័របោកប្រាស់ឬយ៉ាងណា មុននឹងបំពេញព័ត៌មានចូល?

ការបោកប្រាស់តាមអ៊ីនធឺណិតមានច្រើនវិធីណាស់។ អ្នកខ្លះប្រើវិធីកុហកមួយចំនួនឱ្យអ្នកប្រើអ៊ីនធឺណិតបំពេញ ព័ត៌មានសំខាន់ៗរបស់ខ្លួនចូលដូចជាលេខសំងាត់របស់ ATM ហើយពួកនោះក៏ចូលទៅលួចប្រាក់តែម្ដង។

ចំពោះគេហទំព័រដែលមិនស្គាល់ហើយចង់ទិញផលិតផលលើអ៊ីនធឺណិត បើចង់ដឹងថាគេហទំព័រនោះជាគេហទំព័រសុវត្ថិភាព ត្រូវពិនិត្យមើលថាគេហទំព័រនោះមាន SSL (Secure Sockets Layer )ដែរអត់? មានន័យថាប្រសិនបើគេហទំព័រមាន SSL ដូចនេះប្រព័ន្ធនោះនឹងជួយលាក់រាល់ព័ត៌មានផ្ទាល់ខ្លួន និងលេខកូដATM អ្នកបំពេញ។

គេហទំព័រលក់ដូរលើអ៊ីនធឺណិត ebay

ដើម្បីដឹងថាគេហទំព័រនោះមាន SSL ឬអត់ តាមធម្មតាពេលបើកគេហទំព័រដំបូងវាតែងផ្ដើម Address ដោយ http ប៉ុន្តែ គេហទំព័រដែលមានសុវត្ថិភាព ឬអាចឱ្យយើងទុកចិត្តបាននោះលុះត្រាតែគេហទំព័រនោះមាន Address ជា https។

ការដែល http មានអក្សរ S នៅខាងចុងនេះមិនមែនមានន័យថាម្ចាស់គេហទំព័រអាចដាក់បានដោយខ្លួន ឯងនោះទេ ពោលគឺគេត្រូវបង់ថ្លៃនិងត្រូវឆ្លងកាត់ការត្រួតពិនិត្យយ៉ាង ត្រឹមត្រូវ។ ករណីមួយទៀត មានវែបសាយមួយចំនួនពេលបើកដំបូងវាមិនមានលោតជា http នោះទេ ប៉ុន្តែពេលចូលដល់ Link ចុះឈ្មោះ ឬព័ត៌មានអ្វីផ្សេង នោះ Link នោះនឹងលោតជា https វិញ។

ដើម្បីបង្កើនសុវត្ថិភាពក្នុងការទិញលើអ៊ីនធឺណិត មុននឹងចុចលើ Link របស់គេហទំព័រមួយៗត្រូវមើលទៅលើ URL របស់គេហទំព័រនោះ ថាតើ Address របស់គេហទំព័រនោះត្រឹមត្រូវឬយ៉ាងណា? ហើយមិនត្រូវចុចលើ Link ផ្ដេសផ្ដាស ពិសេសមុននឹងបំពេញព័ត៌មានផ្ទាល់ខ្លួន ដែលជាលេខ ATM ហើយត្រូវគិតថាវែបសាយនោះជាទីគួរទុកចិត្តដែរឬអត់ មុននឹងទិញទំនិញលើអនឡាញ៕