តែទោះជាស៊េរីចាស់ ឬថ្មីយ៉ាងណាក៏ដោយ ក៏ត្រូវថែទាំដែរ ដើម្បីប្រើបានយូរដើម្បីកាត់បន្ថយការចំណាយលើថ្លៃជួសជុល ហើយក្នុងនោះថ្មឆាប់ហើមប៉ោង ខូច ឬផ្ទុះ គឺជាបញ្ហាកំពុងប្រឈមលើគ្រប់ស៊េរីទូរស័ព្ទតែម្ដង។ បើនិយាយពីថ្មនៅលើស្មាតហ្វូន Samsung និង Apple ដែលភាគច្រើនប្រភេទ lithium-ion យ៉ាងហោចប្រើបានរយៈពេលពី ៣ ទៅ ៥ឆ្នាំ តែប្រសិនអ្នកមិនចេះថែមទាំទេ វាអាចនឹងឆាប់ខូច។
ដូច្នេះទំព័រនេះយើងសូមលើកយកពីតំណមទាំង ៥ដែលអ្នកប្រើស្មាតហ្វូនមិនត្រូវធ្វើ ព្រោះអាចធ្វើឱ្យឆ្នាំងសាក ថ្ម ព្រមទាំងទូរស័ព្ទឆាប់ខូចបាន។
១) ការប្រើឆ្នាំងសាកមិនមែនរបស់សុទ្ធ (Original) ពីក្រុមហ៊ុន នឹងធ្វើឱ្យថ្មឆាប់ខូច៖
មិត្តអ្នកអានសុទ្ធតែបានយល់ដឹងអំពីចំណុចនេះហើយ ការអះអាងខាងលើ គឺសំដៅលើគុណភាពផលិតតែម្ដង។ ឆ្នាំងសាកមិនមែនរបស់ក្រុមហ៊ុនផលិតផ្ទាល់ មានតម្លៃធូរថ្លៃ តែអន់គុណភាព នៅពេលអ្នកប្រើសាកថ្មទូរសព្ទ គឺអាចធ្វើឱ្យទាំងឆ្នាំង និងទូរស័ព្ទឡើងកម្ដៅខ្លាំង ដែលនេះអាចធ្វើឱ្យធ្វើឆាប់ហើមប៉ោង រហូតផ្ទុះបង្កគ្រោះថ្នាក់ទៀត។
ផ្អែកតាមលទ្ធផលធ្វើតេស្តរបស់គេហទំព័រពិសោធន៍ Lifehacker បង្ហាញថា ឆ្នាំងសាកអាយ មានគុណភាពមិនល្អដូចរបស់ស៊ីនពីក្រុមហ៊ុននោះទេ។
២) មិនត្រូវប្រើប្រាស់ទូរស័ព្ទខណៈពេលកំពុងសាកថ្ម៖
មានលទ្ធផលគួរឱ្យខ្លាចធ្លាប់កើតមានពីមុនរួចហើយ ដែលអ្នកនិយាយទូរស័ព្ទពេលកំពុងសាកថ្មបានជួបគ្រោះថ្នាក់ឆក់ និងផ្ទុះទូរស័ព្ទរងរបួសយ៉ាងដំណំ។ យ៉ាងណា របាយការណ៍បានបង្ហាញថា ហេតុការណ៍ផ្ទុះគឺដោយសារគេប្រើឆ្នាំងសាកអាយ (third-party) អន់គុណភាព មិនមែនរបស់ស៊ីន (original) ផលិតដោយក្រុមហ៊ុនម្ចាស់ទូរស័ព្ទ។ ដូច្នេះ ត្រូវយល់ដឹងចំណុចនេះ មិនត្រូវប្រើទូរស័ព្ទពេលកំពុងសាកថ្ម ដើម្បីជៀសវាងគ្រោះថ្នាក់ជាយថាហេតុ។
៣) ការដាក់ទូរស័ព្ទសាកថ្មមួយយប់ពេញ ក៏ប៉ះពាល់ដែរ៖
ស្មាតហ្វូនរបស់អ្នកគឺមានភាពឆ្លាតវៃ នៅពេលអ្នកសាកថ្មពេញ នោះវានឹងបញ្ឈប់ការសាក។ ទោះជាយ៉ាងណា នេះពុំមានន័យថា អ្នកគួរសាកថ្មចោលរាល់យប់នោះទេ។ ប្រៀបធៀបនឹងពែងទុកមួយអីចឹង ប្រសិនវាពេញហើយ តើអ្នកនៅតែចាក់ទឹកចូលទៀតឬទេ? អាយុកាលថ្មទូរស័ព្ទរបស់អ្នកនឹងថយចុះចន្លោះពី ៤០% ទៅ ៨០% ទោះសាកថ្មពេញតាមធម្មតាក៏ដោយ ប្រសិនអ្នកនៅតែបន្តធ្វើដូច្នេះ។
៤) មិនចាំបាច់បិទទូរស័ព្ទរាល់ថ្ងៃទេ តែយ៉ាងហោចម្ដងក្នុងមួយសប្ដាហ៍បានហើយ៖
ទូរស័ព្ទរបស់អ្នកប្រៀបបាននឹងម៉ាស៊ីនអីចឹងដែរ ដែលត្រូវការសម្រាក មិនអាចបើកដំណើរការរហូតនោះទេ ព្រោះអាចបណ្ដាលឱ្យឆាប់ខូច។ អ្នកជំនាញលើផលិតផលរបស់ Apple បានបង្ហាញប្រាប់អំពីតិចនិកធ្វើឱ្យថ្មមានអាយុកាលប្រើបានយូរ បំផុត ដោយបិទទូរស័ព្ទពីម្ដងទៅម្ដង ពិសេសនៅពេលអ្នកចូលគេងយប់ឡើង។ អ្នកជំនាញលើកឡើងទៀតថា មិនបានបិទញឹកញាប់ យ៉ាងហោចក៏បិទម្ដងក្នុងមួយសប្ដាហ៍ដែរ ដើម្បីរក្សា និងសន្សំសំចៃថ្មទុកប្រើបានមួយកម្រិត។ ចំណែកទូរស័ព្ទដំណើរការដោយ Android ក៏ដូចគ្នា ការ reboot គឺអាចជួយស្ដារថាមពលរបស់ថ្មបាន។
៥) កុំរង់ចាំរហូតដល់ទូរស័ព្ទរលត់ទើបយកទៅសាក៖
ថ្មប្រភេទលីចូមអ៊ីយ៉ុង (Lithium-ion) ដែលឃើញប្រើភាគច្រើននៅលើផលិតផលរបស់ Samsung និង Apple មានគុណភាពល្អអាចសាកប្រើសាជាថ្មីបាន តែក៏មានចំនួនកំណត់នៃវដ្ដសាកថ្មដែរ។ តែប្រសិនប្រើទូរស័ព្ទរហូតរលត់ទើបយកទៅសាកញឹកញយ នោះអាចប៉ះពាល់ដល់ថ្ម ធ្វើឱ្យឆាប់ខូចមុនអាយុ បើតាមអ្នកជំនាញថា វាថែមទាំអាចធ្វើឱ្យទូរស័ព្ទបើកលែងចេញវិញក៏មាន៕
ប្រភព៖ thebnews
0 comments:
Post a Comment